Ахат Алтыншаш Досымбекқызы "Ерен еңбегі үшін" медалімен марапатталды

Республика күніне орай бір топ ұстаздарға өңір басшысы Марат Ахметжанов мемлекеттік марапат ұсынды. Маратталғандардың ішінде қазақ тілі және әдебиет мұғалімі Ахат Алтыншаш Досымбекқызы "Ерен еңбегі үшін" медалімен марапатталды.
Алтыншаш Досымбеккызы Көкшетау мемлекеттік педагогикалық институтын орыс тілі мен әдебиеті, қазақ тілі мен әдебиеті мамандығы бойынша тәмамдап еңбек жолын Көкшетау облысы, Ақан орта мектебінде қазақ тілі мен әдебиеті пәнінің мұғалімі болып бастаған. 1990-1996 жылдары Көкшетау қазақ педагогика училищесінде қазақ тілі мен әдебиеті пәндерінің оқытушысы, 1996 жылдан Көкшетау қаласы, Абай атындағы (қазақ тілінде оқытылатын) №3 облыстық дарынды балаларға арналған мамандандырылған мектеп-интернатында қазақ тілі мен әдебиеті пәні мұғалімі ретінде қызмет атқарып келеді.
Алтыншаш Досымбеккызы кәсіби қызметі үшін көптеген ұйымдардың құрмет грамотасы мен алғыс хаттарымен марапатталған. 2016 жылы ІІІ Халықаралық ғылыми-практикалық конференция жеңімпазы, Ян Амос Коменский атындағы (Халықаралық үлгідегі) медаль иегері. 2017 жылы Москва қаласында өткен ІІ Халықаралық ғылыми-практикалық конференцияда ІІ орын алғаны үшін Абай Құнанбаев атындағы медаль иегері. 2017 жылы ІІІ Халықаралық конкурста «Үздік коучинг – 2017» номинациясы бойынша ІІ дәрежелі Диплом жеңімпазы атанды. 2017 жылы VІІ Халықаралық педагогикалық Инновациялар Жәрменкесінде «Білім беруді дамытуға қосқан үлесі үшін» Грамотасымен марапатталды. 2018 жылы «Білім мазмұнын жаңарту аясында қазақ тілі мен әдебиеті, орыс тілі мен әдебиеті пәндерін оқытудағы білім беру технологиялары» атты облыстық педагогикалық оқуларында жүлделі І орын алғаны үшін І дәрежелі Диплом мен 40 000 теңге Сертификатын иеленді. 2020 жылы «Абай әлеміне саяхат» атты республикалық байқауының «BILIM-ORKENIETI» ұлттық инновациялық ғылыми-зерттеу орталығының Грамотасымен марапатталды. Абай желілік мектептерінің «Үздік оқу-әдістемелік құралдар мен авторлық бағдарламалар» республикалық сырттай байқауында Алғыс хатпен марапатталды.